ده چره! //گیل آوایی

دوارستی تو ایتا خانه خرابا ده چره
واچکستی کراهای واشکسه دارا ده چره

ده چره!

دوارستی تو ایتا خانه خرابا ده چره

واچکستی کراهای واشکسه دارا ده چره

تو نانستی که واکفته مرا سخته روزیگار

کرا تینتیر بامویی بشکسه بالا ده چره

پورزماته کی دپرکسته می دیل غوربته جا

مره انگاره بیگیفتی بی وفایا ده چره

نام آویرم،بمانسته جه همه جا یو جیگا

ترکمه دام تاوه دای عاشقه زارا ده چره

اسا می خاکه میان پاکچینا بو جنگله زار

دابابو هر که فوقوفتن بی گونایا ده چره

آیه هانده ایتا روز رشته میان اویی کونان

واکونم بالا بگم بی دسکلایا ده چره

آی کی بیخود بوبویی ایشپتکانه مرا جور

روزیگار هانده واگرده بی پنایا ده چره

گیل آوایی چو نزن هر کی بوبوسته خالی آب

لیسکه یارا چی واورسی بی وفایا ده چره

از کتاب ” تی واسی ” ، مجموعه غزلهای گیلکی- گیل آوایی